Nåtid

Lars Mytting fortel om bruk av segn i historieforteljing, og om kva som er opphavet bak segnene i bøkene «Hekneveven» og «Søsterklokkene». I samtale med Olav Brostrup Müller, kultursjef i Lillehammer og skribent.

Anna Petersén er arkeolog og forskar. Ho har vore ved dei største arkeologiske utgravingane i middelalderbyane i Noreg. I samtaler med Tormod Stauri og Kristinn Olason ser ho på det norrøne språket og livet som var. Samtala blir leia av kultursjef i Sør-Fron, Bjørn K. Sletten.

Lene Liebe Delset har aldri vokse frå fascinasjonen ved dinosaurane, heldigvis for oss. Hennar engasjement for desse fascinerande dyra er smittande, og ho tek oss med på ei lita reise i deira verd. Åsne Flyen illustrerer dei artige historiane samtidig som Lene snakkar. Etter at Lene er ferdig på scena tek ho med seg borna på ei oppdagingsreise i området, så heng på!

Hallgrim Hansegård, ein av hovudfigurane i FRIKAR, fortel og dansar oss gjennom dansen si historie dei siste 1000 åra. Seinare har han ein «danseverkstad» for born der dei lærer litt om elementa i dansen frå vikingtida.

I løpet av jubileumsåret 2021 har og skal Hundorp 2021 arrangere ulike ungdomsverkstader. Felles for alle, er at ein profesjonell kunstnar eller utøvar i sin sjanger, møter ungdom i sitt lokalmiljø. Ungdommane er i utgangspunktet del av ei gruppe, ein organisert aktivitet. I jubileumsåret skal dei i møte med den profesjonelle og aktiviteten dei gjer saman, reflektere over spørsmål knytt til Nasjonaljubileet – NORGE I TUSEN ÅR, og Hundorp 2021 spesielt, som; kva er nåtida sitt klubbeslag, kva endringar står vi ovanfor? Dei reflekterer over kva som er bra med å bu i Norge i dag og kva dei tenkjer om sitt eige liv og kvar dei er om ti år frå no.

På tusenårsfesten kan du sjå resultata av desse kulturmøta. Kanskje fører det til endring, kanskje ikkje.

Prosjekta er eit samarbeid mellom Hundorp 2021, UKM og lokale aktørar i Innlandet fylke.

Kva tyder eigentleg funna som er gjort på Hundorp på? Kan det tydast noko av tidligare bosetjningar? Arkeolog Ingar Gundersen har ein samtale rundt utgravingane på Hundorp med Henriette Aasen.

Andrea Rudland Haave – Fake News frå Snorre til Trump. «Fake news» er kanskje eit begrep fra dei seinare år, men det fanst mykje falske nyheiter allereie på Snorre si tid. Bli med og test deg sjølv på kor lett det er å la seg lure av fake news!

Norske kirkeakademier vil vere vertskap for ei samtale mellom fire menneske som på ulikt vis er engasjert i dialog og kulturmøte i dag.

Jørgen Watne Frydnes er leiar for Utøya og har nyleg skrive boka «Ingen mann er en øy» der han skildrar prosessen med å gjenopne Utøya som ein stad for læring, samfunnsengasjement og framtidshåp.

Mehda Zolfaqari er ein forteljar- og scenekunstnar med lang erfaring i dialog, blant anna som tidlegare tilsett i Samarbeidsrådet for tros- og livsssynssamfunn (STL). Mehda har bakgrunn frå Iran, har vokse opp i Oslo og jobbar dagleg med formidling av sine historier frå iransk og islamsk kultur i møte med eit norsk publikum.

Kristin Gunleiksrud Raaum er generalsekretær for Norske Kirkeakademier og leiar av Kirkerådet for Den norske kirke. Ho står dagleg i møtet mellom ulike fløyar og interessegrupper i kyrkja.

Ivar Flaten vil leie samtala. Han driv kyrkjeleg dialogsenter i Drammen, og fekk blant anna Brobyggerprisen i 2020.

MjøsFolk – fordi Mjøsa ligg der som eit hjarte midt i det nye Innlandet. Og fordi våre hjarte brenn for tradisjonsmusikken frå Hedmark og Oppland. MjøsFolk består av nokre av Innlandets beste folkesangarar! Her er det fleire som har vunne Landskappleiken i vokal både ein og to og tre gonger. I tillegg kompar dei seg sjølv med gitarar og kontrabass.

Bli med inn i Torill Thorstad Hauger sitt univers om ein outsider frå fortida, Ravnejenta. No skal hennar historie bli til ein internasjonal film, en Game of Thrones for heile familien. Manuset blir skrive av Trond Morten Venaasen. Han skal saman med filmen sin produsent Nicholas Sando fortelje korleis filmen blir til, og korleis det passar for eit moderne publikum.

Ei forteljing om Olav Haraldsson si tid, i stort format. Fortalt av  historikar og forfattar Tore Skeie. Skeie har blant anna har skrive boka Hvitekrist, om nettopp Olav Haraldsson.

Her tek han oss med på ei forrykande reise gjennom den turbulente perioden då vikingtida var på hell og kongeriket Norge var i støpeskeia.

Skeie omtalar Snorresagaen som ei forteljing som høyrer inn under folkloristikken og ikkje i tråd med slik det verkeleg var. Skeie vil også kommentere litt rundt Snorre, i sitt foredrag.

Korleis var det å vera barn og ungdom i vikingtida? Med Hidden kan du sjølv vera barnet som går rundt på Dale-Gudbrands Gard og sjå omgivnadene slik vi trur dei var. Du får eit oppdrag som du skal løyse på Dale-Gudbrands Gard, men kva opplever du på vegen?

Hidden er ein formidlingsplattform for historiske kulturelle og naturlege skattar i landskapet. Last ned appen og begynn vandringa rundt på området. Da vil du sjå at det dukkar opp ei rekkje punkt med informasjon om kva som hende. Du kan sjølv oppleve det som ikkje har stått i historiebøkene.